Sentro Broadcast January 28, 2010

Last night, Sentro ng Katotohanan's Arnel Endrinal and Iya Justimbaste was joined by Get Realist Lester Ople and Ang Kapatiran senatorial candidate Lito David to discuss the day's news as well as Villar's C5 controversy. Listen to the archived broadcast now from www.leadphil.blogspot.com.

Sentro ng Katotohanan is aired live from DWBL 1242KHz, TTh, 8.30-9.30. The program may also be heard live online http://dwbl-am.mellow947.fm

Sentro and the Villar C5 Mess

The following is the transcript of the commentary from yesterday's Sentro ng Katotohanan broadcast:

Villar’s C5 mess

Matapos ang mahigit isang linggo, mainit pa ring usapan ang tungkol sa kaso ni Senador Manny Villar sa Senado na may kinalaman sa proyekto sa C5 Road. Sabi nga po ng Senado sa pangunguna ni Senate President Juan Ponce Enrile na dapat daw pong ibalik ni Senador Villar ang mahigit 6 Bilyong piso na di-umanoy kanyang ninakaw sa kaban ng bayan. Sinabi na po natin noon at sasabihin pa rin po natin ngayon, nakakatawa naman itong pigura na ito at parang nagbibiro tuloy ang senado.

Actually, hindi po senado lamang ang parang nagbibiro, parang nagbibiro po tayong lahat? Bakit ko po sinasabing para tayong nagbibiro?

Kasi po kapag pinag-uusapan ito parang normal lamang sa atin. Sa mga news, pagkatapos ng ganitong balita, balita naman tungkol sa showbiz at tsismis ang lumalabas. Halo-halo po ang mga balita, mga tsismis nakahalo sa ganitong importanteng paratang sa isang senador mula sa senate president mismo. Para pong tsismis as usual lamang, parang normal na lang.

Nakapagtataka po kasi, kung seryoso ito at totoo, at worth 6 Bilyon pesos na corruption, bakit ang tagal na at ngayon lamang pinag-uusapan?

Kahapon, isa pong supporter ni Senator Noynoy Aquino ang nag-email sa akin ng senate committee report na inakda ni Senador Enrile. Sabi pa po niya, ang dokumentong ito raw ay punong-puno ng detalye at pruweba ng corruption ni Senador Villar. Huwag daw nating itong iboto dahil totoong kurakot daw. Parang paniwalang-paniwala sya sa report na iyon. Nakakapagtaka po dahil ang pagkakaalam ko dati, galit na galit din siya sa mga trapong katulad ni Enrile, e ngayon naman po ay parang bilib na bilib na. At kung totoong nariyan ang mga detalye at pruweba, bakit sa tinagal ng panahon wala pa pong nagfifile ng kaso laban kay Senador Villar sa Husgado? Bakit po sa Senado lamang ang usapan? Bakit ayaw pong dalhin sa korte at nang magkalabasan ng ebidensya?

Ang ibig ko pong sabihin ay ganito. Kung gusto nating isiwalat ang corruption, kailangan pong hanapin natin ang puno’t dulo nito. Kailangan natin ang mahinahong pagtingin at hindi mga batikos na mabababaw lamang. Hindi po tayo dapat padagos-dagos na gumawa ng konklusiyon, bagkus ay dapat tingnan natin ang lahat ng mga ebidensya ng mahinahon.

Matagal na pong nangyayari ito. Noong mga nakaraan, ang dami pong batikos laban kay Presidente Gloria Macapagal Arroyo at maging sa First Gentleman, pero wala naman pong nangyari. Marami pong naniniwala sa mga batikos, pero hindi po sapat ang paniniwala nila, sapat para gumawa ng aksyon. Kasi po, ang mga witness at ang mga nagpaparatang, parang mga corrupt din. E sino po ba ang dapat paniwalaan. Tuloy ang nangyayari, hanggang ngayon nabibitin lamang tayong lahat sa katotohanan. Wala pong nakaalam na mga tunay na pangyayari. Ang mga nakakaalam po ay magsalita na kumpleto. Gusto nila ay partial lamang ang sabihin. Para pong nagbibiro o namumulitika lamang.

Kasi po, kapag batikos tayo ng batikos ng walang matibay na basehan, nawawalan po tayo ng kredibilidad. Binibitin lamang po ba natin ang katotohanan at ginagamit sa politika hanggan sa mapipiga ito? Ayaw po ba nating ituloy ang kaso sa husgado dahil may itinatago din tayo? O baka naman talagang biro lamang ang ating paratang at walang katotohanan.

Kung ito po ang ginagawa natin, alam na po nating walang magbabago.. kasama po tayong nagsusulong ng maling sistema sa ating bayan. Hindi po nakakatulong o makakatulong ito. Nalilito lamang ang tao at hindi na nila malaman kung sino at ano ang paniniwalaan. Nawawalan na rin po ang lahat ng tiwala sa kapwa Pilipino. Wala pong mabuting idudulot. Ito ang Sentro ng Katotohanan.

Sentro ng Katotohanan
TTh 8.30-9.30PM, DWBL 1242KHz

On Pork Barrel

The following is a commentary to be read tonight at Sentro ng Katotohanan:

Pork Barrel

Sa tuwing eleksyon ng pampanguluhan, lahat po ng kandidato ay pagbabago ang sinasabi. Kailangan daw alisin ang korapsyon sa gobyerno. Ang kailangan daw natin ay good governance.

Pero kung iisipin po natin, pagbabago po ba kaya talaga ang isinusulong ng mga kandidato?

Ang isa po sa nakikita kong dapat baguhin sa Pilipinas ay ang sistema ng pork barrel. Doon po sa mga hindi nakakaalam, ang pork barrel po ay ang pondo ng gobyerno na inilalaan sa mga congressional projects. Ang mga congressman po at senador ay binibigyan ng pondo ng pangulo para sa kanilang mga proyekto. Minsan, sila po mismo ang gumagawa ng kanilang sariling pork barrel sa pamamagitan ng pagsisingit ng kanilang projects sa iba’t-ibang departamento na dadagdag sa pangkabuoang budget ng gobyerno.

Kung iisipin po natin, ang sistema pong ito ay ginagawa para lumakas ang tsansa ng mga legislator na ma-reelect sila. Ito rin po ay ginawa para mapasunod ng Pangulo ang mga legislators sa kanyang agenda. Meron pa bang ibang dahilan?

Sa totoo lang, ang sistemang ito ay magastos at punong-puno ng corruption. Bilyon piso po ang inilalaan natin para sa pondo ng pork barrel. Sana man lang ay bumabalik sa atin ay mas magandang healthcare at sports program. Pero ang karaniwang bumabalik sa atin ay mga panandaliang medical mission at mga basketball courts lamang. Ang tanong, bakit ayaw pong alisin ito ng mga kandidato?

Sa mga forums na nagdaan, naitanong na po ito sa mga kandidato. Parati po ang sagot nila ay may naitutulong din ang pork barrel. Akala ko po ba ay pagbabago ang kanilang isinusulong? Bakit po ayaw nilang alisin ito ng tahasan? At kung ayaw nila, hindi po ba talagang pinagpapawalang bahala na nila ang kagustuhan ng bayan?

Sa mga kandidato po sa pagkapangulo, iisa lamang po ang narinig ko na tahasang nagsasabing aalisin niya ang pork barrel system sa Pilipinas. Iyon po ay walang iba kundi si JC Delos Reyes ng Ang Kapatiran Party.

Ang mga iba po ay medyo malabnaw ang pronouncements. Sabi po ni Nicanor Perlas sa kanyang plataporma, iaadvocate daw niya ang pag-alis ng pork barrel. Ganun din ang sinabi ni Gilbert Teodoro sa isang speech. Si Jamby Madrigal po, bagamat sinasabi po niya na hindi niya kinukuha ang kanyang pork barrel funds, na nagkakahalaga daw ng 200 milyong piso bawat isang senador, wala naman po aking narinig na pronouncement kung aalisin niya ito kapag nanalo siya bilang pangulo. Si Senador Villar po naman ay ireredesign nya raw ang pork barrel para naka-align sa proyekto ng pangulo. Wala naman pong binanggit tungkol dito ang partido ni Senador Aquino, at pati maging ang kampanya ni Senador Gordon.

Samakatwid, kung titingnan pa lamang po natin ang pork barrel at kung ano ang hinaharap nito, alam na po nating walang magbabago sa ating gobyerno. Sabi nga po nung isang vice presidential candidate ng Ang Kapatiran na nainterview natin, si Atty. Jun Chipeco, sabi niya: paano raw tayo magbabago kung gusto nga raw natin ng pagbabago pero ang ginagawa naman natin ay yung dati pa rin?

Ito ang Sentro ng Katotohanan.

Listen to Sentro ng Katotohanan, 8.30-9.30PM, T-Th, DWBL 1242KHz.

Remembering EDSA II

Yesterday, we discussed the topic of EDSA II at Sentro ng Katotohanan. Perhaps we are the only program on radio that remembered the important event that happened 9 years ago. Listen to the archived broadcast from www.leadphil.blogspot.com for our unique viewpoint on this topic.

EDSA DOS, Nilimot ng Tadhana

The following is a commentary to be read tonight at Sentro ng Katotohanan.

Nilimot ng Tadhana

Siyam na taon na ang nakakalilipas, mayroong isang napakalaki at napakahalagang pangyayari ang naganap sa Pilipinas. Importante po ito at hindi dapat ipagpawalang bahala.. Alam po ba ninyo kung ano ang itinutukoy ko? Siguro po ay nakalimutan ninyo na.. Ang itinutukoy ko po ay ang EDSA DOS.

Siyam na taon na ang nakakaraan, ang Pangulong Joseph Estrada ay bumaba sa Malacanang dahil sa matinding People Power na nagaganap sa EDSA. Kung maaalala ninyo, nag-umpisa sa ilang daan hanggang lumago sa ilang daang libo kung hindi man milyon na bilang ng Pilipino ang nagpunta sa EDSA simula sa gabi ng January 17, 2001 hanggang sa pagbaba sa pwesto ng Pangulong Estrada noong January 20, 2001.

Alam po natin lahat kung saan nag-ugat ang EDSA DOS. Ito po ay nagmula sa impeachment ng dating Pangulo dahil sa kanyang graft and corruption na may kinalaman sa BW Resources Stock manipulation, sa Tobacco Excise Tax, sa Jueteng Bribery scandal at iba pa. Sa sumunod na usapin sa korte, napagtanto po na guilty ang dating Pangulo at nahatulan siya ng habambuhay na pagkakabilanggo. Sa huli, siya po ay binigyan ni Pangulong Arroyo ng pardon at kahapon nga po, sa mismong anniversary ng EDSA DOS, ay pinahintulutan naman ng COMELEC na tumakbo muli bilang Pangulo ng bayan sa darating na halalan.

Kung wala po kayong nakikitang mga pagkakamali sa senaryong ito na nagaganap sa ating bayan, alam na po natin: walang tayong mararating. Kung hindi po natin nakikita kung gaano kababa ang pagtrato natin sa ating sarili at hindi natin pinagpapahalagahan ang mga nakaraan at katotohanan sa ating bayan, talagang hindi tayo makakaalis dito sa kangkungan.

Sabi nga po ng pangalan ng tropang kinabibilangan ng aking co-anchor na si Iya, sabi nila Get Real Philippines. Magpakatotoo ka Pilipinas.

Anong klaseng bayan po tayo kung ang mga pangyayari kagaya ng EDSA DOS ay kalilimutan natin at hindi papansinin, ni hindi natin pag-uusapan kung anong aral ang makukuha natin doon?

Anong klaseng bayan mayroon tayo kung hindi man lang natin makita na mas grabe ang corruption sa panahon ni Marcos at ni Estrada kaysa kay Arroyo? Anong klaseng bayan mayroon tayo kung makakalimutan natin na noong panahon ni Marcos at Estrada, sadyang bagsak at bumabagsak pa ang ekonomiya dahil talagang ayaw na ng mga tao, maging Pilipino man o banyaga na mag-invest at magtayo ng business sa bayan?

Anong klaseng bayan mayroon tayo kung ang isang convicted plunderer na hindi natin alam kung ilan ang anak at asawa at mayroon pa ngang constitutional ban sa reeleksyon ay pinapayagan pang muling tumakbo pagkapangulo? At ang mas malaking tanong: anong klaseng bayan mayroon tayo, kung mayroon pang taong boboto sa kanya, kagaya ng sinasaad sa mga resulta ng mga surveys?

Anong klaseng bayan tayo kung hinahayaan nating sirain ng bawat isa ang integrity at character ng iba, sa pamamagitan lamang ng mga paratang at parinig, nang walang pruweba man lang na ipinakikita? At hinahayaan naman natin ang mga proven na na mangalandakan pa?

Sa inyong nakikinig sa akin, hindi po ito ang bayan natin. Hindi po. Hindi po ito ang bayan ng mga Del Pilar at Luna, ng mga Silang at Malvar. Hindi po. Hindi po ito ang bayan ni Rizal at Bonifacio. Hindi po.

Bawiin po sana natin ang ating bayan. Labanan po natin ang katangahan. Itayo po natin ang ating dignidad. Huwag po sana nating hayaang lokohin tayo ng mga taong nagkukunwaring makabayan at ginagamit ang ating kahirapan para sa kanilang panloloko. Hindi po ito ang laban ng good versus evil. Ito po ang laban ng pagkukunwari at katotohanan. Ito ang Sentro ng Katotohanan.

Sentro on Surveys

Yesterday, Iya-J and myself talked about surveys and their role in the coming Presidential Elections. Even if there is only the two of us talking, we almost run out of time because we just had so many to say!

Listen to the said broadcast now uploaded at www.leadphil.blogspot.com.

The Survey Says...

The following is a commentary to be read in tonight's Sentro ng Katotohanan broadcast, DWBL 1242KHz, 8.30-9.30PM.

Ayon sa Survey..

Isa po sa mainit na pinag-uusapan sa twing may eleksyon na darating ay ang mga Presidential surveys. Sa ngayon po, dalawang survey firms and pinapakinggan ng mga tao, ang SWS (o Social Weather Station) at ang Pulse Asia surveys.

Ang pinakahuling survey na nabasa ko ay yung nilabas ng SWS noong January 11, 2009 kung saan lumalabas na lumiliit na ang lamang ni Senator Noynoy kay Senator Villar. Ang tanong ng marami siguro ay kung makakahabol kaya si Senator Villar kay Noynoy?

Palagay ko, hindi po ito ang tamang katanungan. Dapat po siguro, alamin muna natin kung ano ang papel ng surveys sa darating na eleksyon.

Para sa akin po, para sa mga botante, walang naman dapat saysay ang mga surveys. Ang mga surveys po ay ginagawa para sa mga kandidato, hindi para sa botante. Para po sa mga kandidato, malalaman nila kung ano ang dapat nilang gawin upang manalo sa eleksyon base sa surveys. Sa botante po kaya, para saan ang surveys?

Halimbawa sa survey, lumalabas na nangunguna ang isang kandidato, dapat po ba iyon na ang iboto ng lahat? Mali po iyon hindi po ba? Halimbawa, mababa naman sa survey ang isang tao, dapat po ba huwag na siyang iboto dahil masasayang lang ang boto mo? Parang ang babaw naman po yata ano?

Noong dati po, sa survey, bago sila maglaban, mas malaki pong lumalabas ang tsansa na manalo si Oscar Dela Hoya kay Manny Pacquiao ayon sa betting odds sa Las Vegas na pumapabor kay dela Hoya. Dapat po ba noon, kumampi na tayo lahat kay Dela Hoya at iwanan na natin ang ating pambato? Sigurado ko ang sagot ng lahat ay hindi. Pero kung pupusta kayo ng pera kung sino ang mananalo, siguro magdadalawang isip kayo hindi po ba? Siguro, pupusta na lang kayo kay Dela Hoya.

Siguro, kung ako ang pupusta sa sino ang mananalo kung ang eleksyon ay gagawin ngayon, malamang pumusta ako na si Senator Noynoy Aquino ang mananalo. Pero ang eleksyon po ay hindi pustahan. Ang tanong po sa atin sa eleksyon ay kung sino ang kandidato ang pinaka malamang na magpapa-unlad sa bayan natin, sino ang kandidato na makapagsasa-ayos ng ating lipunan? Sino sa mga kandidato ang mag-aahon sa mga mahihirap at makakapagbibigay trabaho sa lahat?

Sa kasamaang palad, ang mga surveys po ay ikinakalat ng mga kandidato para sa kanya-kanyang maproprobecho. Ginagamit po nila itong pambuyo at pang akit para sila ang iboto. Gumagawa po sila ng trending, gusto po nilang sabihing may clamor para sa kanila o kaya’y lumalakas ang kanilang posisyon sa survey para makadagdag ng botante. In short, binobola po tayong lahat sa pamamagitan ng surveys.

Panigurado, alam naman ng SWS at Pulse Asia ang ginagawang ito ng mga kandidato. Alam nila na ginagamit ng kandidato ang kanilang surveys, at nagpapagamit naman sila. Ewan ko at masyado po yata akong nangangarap, pero kung nagpagamit sila sa mga kandidato, ang palagay ko ay tungkulin naman nila na ipaliwanag sa tao kung ano ang papel ng surveys sa ating eleksyon. Sa palagay ko po ito ay kanilang tungkulin hindi lamang bilang Pilipino kundi bilang tao.

Kung hindi po nila gagawin iyan, wala po akong respeto sa kanila, dahil kabilang sila sa mga grupo ng mga maimpluwensyang tao na sadyang sumisira sa bayan. Ito ang Sentro ng Katotothanan.

www.leadphil.blogspot.com

Sentro Last Thursday

Last Thursday, January 14, 2010, Sentro discussed issues relating to Presidential forums and debates. Mr. Lester Ople, also of Get Real Philippines joined Iya-J and myself to discuss said topic.

Said broadcast may now be heard online from www.leadphil.blogspot.com.

Sentro on Debates and Forums

Sentro ng Katotoahanan will be on again tonight, at DWBL 1242KHz, 8.30-9.30PM. The following is a commentary to be read in the broadcast:

Mga Forums at Debate

Kanina, napanood ko sa ANC ang isang Presidential Forum na ginanap sa AIM (Asian Institute of Management). Doon po, tatlong kandidato ang umattend, sina Gilbert Teodoro, Dick Gordon at Manny Villar. Sa palagay ko po, sa lahat ng forum na napanood ko, maging kumpara sa forums na ginawa rin ng ANC, eto pong forum kaninang umaga ang pinakamahirap at pinakaimportante para sa mga kandidato. Ito po sa palagay ko ang pinaka-prestigious dahil sa prestigious roster ng mga natatanong. Ilan po sa mga nagtanong ay ang Presidente ng European Chamber of Commerce, si Mr. Flor Cruz ng CNN, si Ms. Pamintuan ng Phil. Star, si Jose Cuisia, dating governor ng Central Bank, at maging ang dating Presidente Fidel Ramos. Ang mga katanungan po ang nakasentro sa economiya, sa competitiveness ng Pilipinas sa foreign investors, sa Maguindanao massacre, sa foreign relations. Maganda dahil puro issues po ang usapan at kumukuha ng direct answers sa mga kandidato.

Sa palagay ko, malaking pagkakamali po ni Noynoy Aquino ang hindi niya pagdalo sa forum na ito. Parang lalabas na natatakot siya sa mga mahihirap na tanong at hindi niya talaga kayang tumindig sa sariling paa Ano kaya ang dahilan ng Senador? Malaki po ang tama sa kanya ng nangungutyang tanong ng dating Pangulong Ramos: Where are the Others?

Noong dati po, si Senador Villar ay hindi umattend ng forum ng ABS-CBN sa UST na hosted ni Ted Failon. Kwinestyon ko rin po ang Senador noon sa aking komentaryo kung bakit hindi siya umattend. Pero ngayon po ay naiintindihan ko. Lumalabas pong hindi umattend si Villar doon dahil na rin kay Ted Failon mismo. Mukhang may personal na alitan po sila at hindi umaasa ng fairness si Villar kung si Failon ang magtatanong.

Pero kanina po, si Ricky Carandang ng ANC and host ng forum. Mukhang safe naman po iyong host na yon. Mukhang matagal na rin pong nasabihan si Noynoy Aquino tungkol sa forum na ito (dahil isang linggo na ring pinag-uusapan sa mga internet forums ang hindi niya pag-attend dito). Ano po kaya ang kasagutan ng Senador? Nasaan po kaya siya?

Pero kung ako po ang tatanungin palagay ko po sa mga ganitong forums kung saan iniimbitahan ang lahat ng kandidato, dapat po siguro ay gawin itong debate at hindi forum lamang. Kapag debate po, malalalaman natin kung saan magkakaiba ang kanilang mga plataporma at stand sa issue. Kung forum lamang, pwede po silang sumagot ng pare-pareho at walang pagkakaiba. Makakalito po iyon sa mga botante. Madali lamang po namang gawin ito, at nasa host po iyon. Pwede lang pong i-challenge ng host ang mga sagot, at itanong sa bawat isa kung ano ang reaksyon nila sa mga sagot ng iba. So importante po talaga ang debate.

Bukod po dito, sa palagay ko, dapat ay huwag piliting i-cover lahat ng issues sa iisang forum. Dapat po ay may debate na hiwa-hiwalay sa bawat issue. Dapat po, may debate isang araw tungkol sa economiya at business, may debate sa ibang araw tungkol sa peace and order, may debate ibang araw tungkol sa healthcare at women’s issues, may debate sa ibang araw tungkol sa charter change, at kung ano-ano pa..

Ang isa pa pong gusto ko sanang makita ay ma-improve ang treatment ng mass media sa mga debate at forums, at maging mga sa interviews. Kung mapapansin ninyo, ang forum po ng GMA, hindi kino-cover ng ABS-CBN, ang forum naman ng ABS-CBN, hindi pinapansin ng GMA. Ang interview ng isang station hindi pinipick-up ng kabilang istasyon. Ang interview sa isang radio hindi nalalaman sa kabila at nang buong bayan. Ang nangyayari po tuloy, ang bawat tanungan at interviews ay nagakakapare-pareho lamang ng tanong. Paulit-ulit at hindi na tayo nakakasulong.

Masasabi ko po sa mass media, natutuwa ako sa improvement na nangyayari, noong dati po walang mga forums na ganito, ngayon mayroon na. Kung ginawa po natin ito dati, siguro hindi nanalo si dating Pangulong Erap Estrada, at maging ang Pangulong Gloria Macapagal Arroyo na parehong expert sa pag-iwas dito. Pero huwag po sana tayong tumigil, pwede pa nating itama at iimprove ang ating ginagawa. Marami pa pong improvement na pwede tayong gawin. Debate po ang kailangan natin, iba-ibang debate iba-ibang araw at malawakang pagpapakalat ng impormasyon na napupulot dito sa lahat ng station ng radio at TV at pati sa dyaryo. Dapat po nating gawin ito, para sa ating kinabukasan. Ito ang Sentro ng Katotohanan.

www.leadphil.blogspot.com

Sentro with Transform Politics Advocacy

Yesterday, Sentro ng Katotohanan talked with two people, although belonging to separate groups with different advocacies, are together pushing for what they call a Transform Politics movement.

Mr. Roy Cabonegro is part of Partido Kalikasan which main concern is the preservation of the environment. Meanwhile, Mr. Don Flordeliza Jr. is part of Save our Nation and is a peace advocate in Mindanao. What brought them together is their desire to help look for leadership in the country by establishing a people-initiated candidate selection process.

Listen to yesterday's broadcast from www.leadphil.blogspot.com.

Are we ready to be Green?

The following is the commentary I read during the Sentro ng Katotohanan broadcast yesterday.

Handa ba tayong maging Berde?

Noong nakaraang taon, noong Setyembre at Oktubre, talagang nasa gitna po ng balita ang tungkol sa bahang idinulot ng Ondoy at Pepeng. Lahat po ng tao, ito ang pinag-uusapan. Napakarami po ang nasalanta, mahigit 600 ang namatay sa dalawang bagyo. Daang libo po ang nagpunta sa evacuation and relief center at mahigit isang Milyong Pilipino ang diretsong naapektuhan. Mahigit 30 Bilyong Piso raw po ang nasira sa infrastructure at agriculture. Sa isang bansang mahirap gaya natin, e talagang malaking dagok ito.

Sa kabilang banda, marami ang nag-donate, sa Red Cross, at maging sa TV networks na tila mo kumukumpitensya pa sa Red Cross. Kabi-kabila po ang donation drive, may mga concerts ng mga banda at iba pang musicians, may mga artista sumasagot sa telepono sa TV para makuha ang donations at kung ano-ano pa. Napakalaking balita po, siguro ito ang pinakamalaking balita sa atin noong 2009.

Ngayon, makatapos ang tatlong buwan, ano na po ang nangyari. Nakalimutan na po ba natin? Kailan po kaya natin maaalala ito..., pag dumating ang susunod na grabeng pagbaha?

Ano na po kaya ang nangyari sa Reconstruction Commission na itinatag ng gobyerno. Bakit po kaya wala na tayong naririnig na balita? Ang alam ko po si businessman Manny Pangilinan ang Chairman ng Commission na ito. Sa isang businessman po kagaya ni Mr. Pangilinan, imposible pong walang nangyayari. Bakit po kaya hindi natin naririnig?

Ang isa pong component ng sakuna na nangyari ay ang mga environmental concerns. Kung narinig na po natin ang global warming, yun po ang tinutukoy ko. Marami po ang nagsasabi na kaya ganito kagrabe ang pagbaha sa atin ay dahil sa global warming na dulot daw ng mga greenhouse gasses na karamihan ay nanggagaling sa mga advanced countries. Kung meron pong makakaalala, nagkaroon po ng environmental summit noong disyembre sa copenhagen, Denmark. Dumalo po ang Pangulo natin doon. Meron po bang nakakaalam kung ano ang ginawa ng pangulo doon? Bakit po kaya, sa kabila ng Ondoy at Pepeng ay parang hindi tayo gaano interesado?

Sa mga nagaganap po sa ating bayan, meron po bang mga bagay na ginagawa ang mga tao upang maiwasan ang pagbaha? Napag-uusapan pa po ba ang waste management at tamang pagtatapon ng basura? Napag-uusapan pa po ba ang pag-convert ng mga gamit na na plastik pabalik sa langis? Napag-uusapan pa po ba ang alternative fuel sources?

Bakit po kaya hindi?

Sa palagay ko po, ang pinag-uusapan ng mga tao ay kung ano ang nakikita nila sa mass media. Kung ang mass media po ay hindi interesado, hindi rin po interesado ang mga tao. Kung ang mass media po ay interesado lamang kumuha ng mga donasyon para pambigay sa mga biktima ng baha, at hindi interesado sa mga bagay na dapat gawin para maiwasan ang baha.. alam na po natin kung nasaan ang katumbas na interes ng tao. Kung ang mass media po ay hindi handang maging berde, hindi po tayo magiging handang maging berde o Green.

Makikita po natin, na ang mass media po ay may kapangyarihang mag-set ng agenda sa ating bayan. Ito ang Sentro ng Katotohanan.

www.leadphil.blogspot.com

Sentro and Candidate Criteria, Last Part

Last night, OrionD and another Get Realist Filo-E (Filo Efiaelo) joined Iya-J and myself to discuss more of the necessary criteria in selecting Presidential candidates in May 2010.

We agreed that there are three basic criteria namely integrity, competence (including preparation and intelligence) and past performance (record), each of which cannot stand without the others. Although 3 are the basic criteria, there is a fourth dimension: Vision, which defines the candidate's leadership.

Listen to the archived broadcast from www.leadphil.blogspot.com.

The Importance of Mass Media

The following is to be read as talking points commentary at Sentro ng Katotohanan, tonight.

Ang Halaga ng Mass Media sa Pilipinas

Noon pong isang buwan, napanood ko po sa internet ang isang interview ng blogwatch kay Senator Manny Villar. Ang interview po ng blogwatch na iyon ay pinangunahan ni Ms. Noemi Dado, si mom-blogger na nainterview na natin dito sa Sentro ng Katotohanan.

Doon po sa interview na iyon, may nabanggit po si Senator Villar na ang may pinaka-malaking impluensya daw po sa mga Pinoy ay ang broadcast media, kasama na ang radio at TV. Ibig sabihin, kung may mga nakikita tayong mga mali sa gawain ng Pinoy na hindi mabago-bago, iisa lamang ang pwede nating masisi.

Noon pong bagong taon, bagamat parating nagpapaalala ang mga taga DOH na huwag nang magpaputok, marami pa rin po ang nasugatan sa paputok at maging sa ligaw na bala. Ibig sabihin po nito, mababa po ang impluensya ng DOH o ng gobyerno sa taong bayan. Kung ang mass media siguro ang nanguna sa pag-wawarning sa mga tao na huwag nang magpaputok, na hindi naman ginawa ng mass media, mas epektibo po siguro sana.

Kung pagmamasdan po natin ang mga kabataan, sino po ang karaniwang ina-idolize nila at ginagaya? Hindi po ba ang mga artista at singers na nakikita nila sa TV? Meron na po ba tayong narinig na mga kabataan na naging idol nila ang kanilang principal o teacher, o ang kanilang pari? Kung meron man po, siguro ay kakaunti lamang.

Kaya ko po sinasabi ito, sa palagay ko po kasi, sunod sa pamilya, pinakamalaki ang impluensya ng mass media sa mga kabataan. Mas malaki po ang impluensya ng mass media sa kanila kaysa sa iskwelahan, simbahan o gobyerno man. So, kung mayroon pong dapat ituro sa taong bayan, sa mass media po lamang ang pinaka-effective na daan.

Kaya po siguro ang mga grupong El-shaddai, Jesus is Lord at ang simbahang Iglesia ni Kristo ay maraming mga broadcasts sa Radio at TV.

Kitang-kita rin po ang pagpapahalaga ng mga politicians dito. Sina Sen. Aquino, Sen. Villar, Dick Gordon at Gibo Teodoro ay tuloy-tuloy ang paglalagay ng mga advertisements sa Radio at TV. Hindi naman po siguro sila gagastos ng milyon-milyong piso kung hindi importante ang radio at TV.

Kung ganito po kahalaga ang broadcast media, bakit po parang pinagbabale-walang bahala ito ng marami? Makinig po kayo ng radio kahit anong oras, kung ano-ano po ang pinag-uusapan. Ang isa sa mga pinakasikat na DJ sa FM, si Mo Twister, ang madalas pong pinag-uusapan sa kanilang programa ay kung sino ang pinakahottest na babe sa TV. Kung mayroon mang importanteng bagay na pinag-uusapan sa kanyang program, yung po ay bihirang-bihira lamang.

Makinig o manood po kayo ng balita, mabababaw lamang po ang mga ito. Puro po drama ng buhay ang paulit-ulit na pinapakita. Wala rin pong kino-cover sa gobyerno kundi tungkol sa corruption lamang – karamihan pa nga po ay mga press release lamang ng mga magkakalabang faction. Nagugulat pa nga tayo, maimplement na pala ang AFTA o ang ASEAN Free Trade Zone, nagugulantang na lamang ang mga maliliit na nating businessmen. At kalahati po siguro ng news sa TV ay puro tsimis tungkol sa mga artista – tila niyo ba ito ang pinaka-importante sa bayan.

Ni ang sports po at culture ay hindi nabibigyan ng espasyo sa mass media. Wala po tayong alam sa culture kundi StarStruck at PinoyBigBrother. Wala po tayong kilala kundi si Manny Pacquiao. Nagdaan po ang Sea Games late last year, napansin po ba ninyo?

Kulang na kulang po ang leader sa ating bayan, mi hindi nga makabuo ang mga partido ng kanilang senatoriables.

Ito po ang dahilan kung bakit itinatag ko ang Lead Philippines – para tumulong maghanap ng mga leader ng bayan. Kaso po, kung aasahan lamang natin ang radio at TV na ipakita sa atin ang mga leaders sa hinaharap, e mukhang wala po tayong maaasahan. At gayundin, kung hihintayin natin sila na ipaalam sa atin kung ano ang importante sa hindi, e mukhang mabibigo tayo. Kaya naman po ang Lead Philippines ay nag-proproduce ng programang katulad nitong ginagawa natin. Sana po ay tulungan at tangkilikin ninyo kami.

Ito ang Sentro ng Katotohanan.

Sentro ng Katotohanan, TTh, 830-930PM, DWBL 1242KHz

More on May 2010 Criteria

Last Tuesday, Sentro ng Katotohanan continued to discuss with OrionD different criteria for selection of candidates for May 2010. Said broadcast may now be listened to from www.leadphil.blogspot.com.

Something new in New Year

The following is a commentary to be read during tonight's Sentro ng Katotohanan broadcast.

Meron bang bago sa bagong taon?

Noong New year, nanonood ako sa CNN ng mga balita tungkol sa mga celebrations ng New Year sa buong mundo..

Napanood ko ang ganda raw ng mga fireworks display sa New York kung saan may isang milyong kataong nanood daw doon sa Times Square nang tinatawag nilang ball drop na naghuhudyat ng pagbabago ng taon.

Sa New Zealand, nagparty daw ng husto sa Auckland sa gitna ng mga paputukan sa Sky Towers doon. Sa Australia daw sa Sydney harbor bridge, nagsayawan daw ang mga tao habang nagaganap ang 12-minute na firework display.. Sa Seoul Korea, meron daw malaking bell na pinatugtog sa gitna ng mga tao.. May multi color light show naman daw sa Eifel tower sa France, Sa Taiwan, pinakita yung pinakamataas na building doon yung Taipei 101 na punong-puno ng paputok. Sa London, hinintay daw ng mga tao ang pagstrike ng Big Ben doon at tuwang-tuwa sila sa fireworks display sa London Eye, yung malaki nilang ferris wheel doon.. Ang galing, ang gaganda ng fireworks..

Pagkatapos doon, inilipat ko naman ang TV ko sa local Channel. Sa atin daw, marami ang sugatan, daan daan ang nasugatan ng picolo at kwitis. Mahigit 25 daw ang natamaan ng ligaw na bala. At may mga batang naputulan ng daliri..

Sa palagay niyo mga tagapakinig, sa ganitong sitwasyon, may nabago po ba o may mababago sa ating bayan?

Sa ngayon, ang bilang po ng nasusugatan sa atin sa paputok ay mahigit nang 800. Marami po ay natamaan ng bala. Marami po ay mga lasing at mga bata. Marami rin po ang namatay. Para pong may nangyaring sakuna. Para pong may lumubog na barko o may Ondoy na nagdaan.

May problema po tayo sa warlords.. May problema po tayo sa baha.. may problema tayo sa corruption at may problema po tayo sa kahirapan.. Pero kung ang simpleng celebrasyon ng new year ay hindi po natin maiayos, may-ma-sosolve po kaya tayong problema?

Kanina po nagkakagulo ang mass media tungkol sa mga balita sa arraignment ni Andal Ampatuan Jr. Nagagalit po ang mga tao tungkol sa VIP treatment daw kay Ampatuan. Kinukutsa po ng mga tao ang 6-man commission na binuo ng gobyerno para idismantle ang private armies.

Pero mga tagapakinig ko, concerned po ba tayo talaga? Bakit hindi tayo nagagalit sa ating gobyerno, sa kawalan nila ng aksyon sa paputok, at sa ating mga kababayan sa kanilang katigasan ng ulo?

Sige po, happy new year na rin po. Sana po, may makita tayong something new, sa new year na ito.

Ito ang Sentro ng Katotohanan.

Listen to Sentro ng Katotohanan, 8.30-9.30PM, TTh, DWBL 1242KHz